News of Nation

अधिकारीलाई चप्पलले कुटिरहेको बिजेपी नेतृको भिडियो भाइरल

हरियाणा भारतीय जनता पार्टीकी नेता सोनाली फोगाटको एउटा भिडियो सोसल मिडियामा भाइरल भएको छ, यसमा उनी एक व्यक्तिलाई चप्पलले कुटिरहेको देख्न सकिन्छ । टिकटक स्टार सोनाली फोगाटले गत वर्ष राजनीतिमा कदम राखेकी थिइन् र बिजेपीमा प्रवेश गरेकी थिइन् ।

उनले हरियाणा विधानसभा चुनावमा आदमपुर सीटबाट कांग्रेस कुलदीप विश्नोईविरुद्ध चुनाव लडेकी थिइन् । यद्यपि, चुनावी मैदानमा उनी विश्नोईसँग पराजित भएकी थिइन् । पिटाई खाने व्यक्ति हिसार मार्केट कमिटीका सचिव हुन् ।

सोनाली खाद्यान्न बजार किसानका केही समस्या लिएर उनलाई भेट्न गएकी थिइन् । भिडियोमा देखिएअनुसार उनको ती अधिकारीसँग बहस भयो त्यसपछि उनी अधिकारीलाई चप्पलले कुट्न थाल्छिन् । अधिकारीले आफूले अह्राएजति सबै काम गरिरहेको भनेर नेतृलाई जानकारी दिएको पनि सुन्न सकिन्छ ।

भिडियोमा सोनालीले आफूमाथि दुर्व्यवहारपूर्ण तरिकाले बोलेको भन्दै रिस पोखेको पनि देख्न सकिन्छ । यहाँ रोचक कुरा के छ भने त्यहाँ एक प्रहरी अधिकारी पनि उभिएको देख्न सकिन्छ जसले सोनालीलाई एकपटक पनि रोक्न कोसिस गर्दैनन् । कांग्रेसका प्रवक्ता रणदीप सिंह सुरजेवालाले यो भिडियो ट्वीट गर्दै मनोहर लाल खट्टर सरकारमाथि आरोप लगाएका छन् ।

उनले प्रश्न सोधेका छन्, ‘के हरियाणाका कर्मचारी बिजेपी नेतामार्फत् अपमानित हुन र थप्पड–चप्पल खानका लागि हुन् ? के हरियाणाका कर्मचारी भाजपाका नोकर हुन् ? के कर्मचारी जनावर हुन् ? कारवाही कहिले गर्नेछौ ?’ सोनाली फोगाट विधानसभा चुनावका बेला पनि चर्चामा आएकी थिइन् । उनको चुनावी प्रचारको क्रममा थुप्रै चर्चा विवादमा तानिएको थियो ।

Facebook Comments

Leave A Reply

Your email address will not be published.