News of Nation

यातायात कार्यालय कोशीका चार पूर्व प्रमुखसहित १७ जनाविरुद्ध मुद्दा

सुनसरी, २५ जेठ–यातायात व्यवस्था कार्यालय कोशी (इटहरी) मा ४० करोड भन्दा धेरै रकम भ्रष्टाचार भएको ठहर गर्दै अख्तियार दुरुपयोग अनुसन्धान आयोगले १७ जनाविरुद्ध मुद्दा दर्ता गरेको छ ।

यातायात व्यवस्था कार्यालय ९सवारी० कोशीका तत्कालीन कार्यालय प्रमुख नयराज नेपालसहित १७ जनाविरुद्ध राजश्व रकम हिनामिना गरेको अभियोगमा अख्तियारले आज (आइतबार) उनीहरुविरुद्ध भ्रष्टाचार मुद्दा दर्ता गरेको हो ।

अख्तियारले कार्यालयका चार पूर्व प्रमुखसहित १७ जनाविरुद्ध ४० करोड ७३ लाख ५० हजार ४३० रुपैयाँ बिगो मागदाबी गर्दै मुद्दा दर्ता गराएको हो ।

अख्तियारले २०७३ चैतदेखि २०७४ असार मसान्तसम्मको अनुसन्धानका क्रममा उपलब्ध भएका तथ्यगत विवरण, प्रमाण कागज समेतका आधारमा सेवाग्राहीहरुबाट संकलित रकम हिनामिना गर्ने १७ जनाविरुद्ध विशेष अदालतमा मुद्दा दायर गरिएको जानकारी दिएको छ ।

अख्तियारले उनीहरुलाई भ्रष्टाचार निवारण ऐन, २०५९ वमोजिम कैद सजाय र जरिवाना एवम् बिगो असुल गर्न मागदाबी लिई आरोपपत्र दायर गरेको अख्तियारका प्रवक्ता प्रदीप कोइरालाले जानकारी दिएका छन् ।

तत्कालीन कार्यालय प्रमुखहरु नयराज नेपाल, तीर्थराज लम्साल, गोपाल थपलिया र भुपेन्द्र राईसहित १७ जनाविरुद्ध भ्रष्टाचार मुद्दा दर्ता गरिएको छ । मुद्दा चलाइएकामध्ये अधिकांशसँग करोडभन्दा धेरै बिगो माग गरिएको छ ।

अख्तियारले तत्काली कार्यालय प्रमुख नेपालसँग एक करोड ८ लाख २९ हजार ६९ रुपैयाँ बिगो माग गरेको छ । त्यस्तै तत्कालीन कार्यालय प्रमुख थपलियासँग एक करोड ३० लाख ७२ हजार १५३ बिगो माग दाबी गरिएको छ ।

यस्तै तत्कालीन प्रमुख राईसँग ५६ लाख १२ हजार ५ सय ७४, तत्काली लेखअधिकृत टीकाराम अधिकारीसँग १ करोड २५ लाख ४८ हजार ६, तत्कालीन लेखापाल सुरेश अधिकारीसँग ३ करोड ७२ लाख ४४ हजार ७५५, तत्कालीन लेखापाल रुद्रप्रसाद दाहालसँग ३ करोड ४८ लाख ९३ हजार २१६ र तत्कालीन लेखापाल अर्जुन भट्टराईसँग २ करोड १७ लाख ३२ हजार ४७३ बिगो माग दाबी गरिएको छ ।

अख्तियारले चार जना कम्प्युटर अपरेटरहरुसँग जनही ५ करोड ९४ लाख ९८ हजार ९३१ रुपैयाँ बिगो माग दाबी गरेको छ । यस्तै चार जना तत्कालीन कम्प्युटर अपरेटरहरु रमेश पौडेल, भूमिराज अधिकारी, हरिमदन ढुङ्गेल र फोकन वान नेपाल प्रालिका कम्प्युटर अपरेटर राकेश रोशन मर्साङ्गीविरुद्ध जम्मा २३ करोड ७९ लाख ९५ हजार ७२४ रुपैयाँ बिगो दाबी गरिएको छ ।

Facebook Comments

Leave A Reply

Your email address will not be published.