एजेन्सी (काठमाडौं), १० भदौं–ब्राजिलका पूर्व फुटबलर रोनाल्डिन्हो पाराग्वेमा पाँच महिना हिरासतमा बसेपछि रिहा भएका छन् । रोनाल्डिन्हो र उनका भाइ रोबर्टो डी आसिसलाई यसै वर्ष मार्चमा नक्कली राहदानी राखेको आरोपमा प्रहरीले हिरासतमा लिएको थियो । रोनाल्डिन्होसँगै उनका भाइलाई पनि रिहा गरिदिएको छ ।
पक्राउ परेपनि रोनाल्डिन्हो र उनका बिजनेस म्यानेजर समेत रहेका भाइले एक महिनामात्र जेलमा बिताए । बाँकी चार महिना उनीहरुलाई पाराग्वेको राजधानी असुनसियानको लक्जरी होटलमा गृहबन्दीका रुपमा राखिएको थियो । उनीहरुलाई दुई लाख अमेरिकी डलर जरिवाना पनि सुनाइएको छ । रोनाल्डिन्होले अब जुनसुकै देशको यात्रा गर्न सक्नेछन् । उनीमाथि जरिवाना बाहेक कुनै प्रतिबन्ध लगाइएको छैन ।
रोनाल्डिन्हो मार्चमा बालबालिकाको एउटा च्यारिटीमा सहभागी हुन आफ्ना भाइसँग पाराग्वेको राजधानी पुगेका थिए । उनी जुन होटलमा बसेका थिए, प्रहरीले त्यहीँ हिरासतमा लिएको थियो। दुवैमाथि झुटो पासपोर्टको सहारामा पाराग्वे प्रवेश गरेको आरोप लागेको थियो । पक्राउ परेका कारण रोनाल्डिन्होले आफ्नो ४० औं जन्मदिन पनि बन्दी बनेरै बिताउनुपरेको थियो।
अभियोजनकर्ताहरुले झूटो पासपोर्ट प्राप्त गर्न फुटबलरको कुनै भूमिका नरहने भए पनि उनका भाइलाई आफूहरु नक्कली पासपोर्टको सहायतामा पाराग्वे प्रवेश गर्दैछौं भन्ने थाहा थियो भनेका छन् । रोनाल्डिन्होले आफ्नो फुटबल करियरमा पेरिस सेन्ट जर्मेन (पीएसजी), बार्सिलोना र एसी मिलान जस्ता क्लबबाट खेलेका छन्।
सन् २००२ मा ब्राजिललाई पाँचौ विश्वकप जिताउन सहयोग गरेका उनले सन् २०१८ मा फुटबलबाट सन्यास लिएका थिए ।