क्याम्पा बजार (कमल), ३ मंसिर–झापाको कमल गाउँपालिकामा जापानिज इन्सेफलाइटिस (जेइ) रोगको नियन्त्रण, निवारण तथा उन्मूलनका लागि रोगसम्बन्धी सर्भिलेन्स तथा खोप अवस्थाको अनुगमन गर्ने उद्देश्यले महिला स्वास्थ्य स्वयंसेविकाहरूका लागि अभिमुखीकरण कार्यक्रम सम्पन्न भएको छ।
कमल गाउँपालिकाको आयोजना तथा स्वास्थ्य कार्यालय झापा र आड्रा नेपालको समन्वयमा सम्पन्न उक्त अभिमुखीकरण कार्यक्रममा गाउँपालिका अध्यक्ष हुकुमसिंह राई, प्रमुख प्रशासकीय अधिकृत सुमन यङ्या, स्वास्थ्य शाखा प्रमुख दीपक दहाल, जनस्वास्थ्य निरीक्षक मेनका पौडेल, जनस्वास्थ्य अधिकृत प्रकृति दाहाल, अन्य कर्मचारीहरू तथा गाउँपालिकामा कार्यरत २४ जना महिला स्वास्थ्य स्वयंसेविकाहरूको उपस्थिति रहेको थियो।
कार्यक्रममा जे.ई.रोग, यसको रोकथाम तथा नियन्त्रण, खोपको महत्त्व र खोपको अवस्थासम्बन्धी सहजीकरण स्वास्थ्य शाखा प्रमुख दीपक दहालले गर्नुभएको थियो। त्यसैगरी, आड्रा नेपालका प्रदेश अधिकृत प्रवेश रिजाल र समीर भण्डारीले सर्भिलेन्ससम्बन्धी विषयवस्तुको प्रस्तुतीकरण तथा प्राविधिक सहजीकरण गर्नुभएको थियो।
अभिमुखीकरणपश्चात् महिला स्वास्थ्य स्वयंसेविकाहरूले आगामी मंसिर १५ गतेभित्र आफ्नो कार्यक्षेत्रका घरधुरीमा पुगेर सर्भिलेन्स गर्नेछन्। एक जना महिला स्वास्थ्य स्वयंसेविकाले आफ्नो टोलका करिब ९० घरधुरीमा पुगेर ५ वर्षमुनिका बालबालिकाको नियमित खोप पूरा भएरनभएको तथा ३० वर्षमाथिका नागरिकले जे.ई.खोप लगाए–नलगाएको अवस्थाबारे जानकारी संकलन गरी प्रतिवेदन पेश गर्नेछन्।
यस सर्भिलेन्सबाट खोप छुटेका बालबालिका तथा जे.ई.खोप नलगाएका लक्षित उमेर समूहका नागरिकको पहिचान गरी आवश्यक खोप सेवाको पहुँच सुनिश्चित गर्न सहयोग पुग्ने अपेक्षा गरिएको छ।
