काठमाडौं, २५ मंसिर–रसुवामा कानमा लगाएको सुन लुट्न ६ वर्षीया बालिकाको अपरहणपछि हत्या भएको छ । रसुवाको कालिका गाउँपालिका–१ फैलिगाङ की ६ वर्षीया बालिका सुमिना तामाङ विद्यालयबाट अहपरणपछि हत्या भएको हो ।
वागमती प्रदेशका डीआईजी वसन्त लामाका अनुसार स्थानीय ग्राङ प्राविमा अध्ययनरत सुमिना आइतबार (२१ मंसिर) मा हराएकी थिइन् ।
अबेर साँझसम्म सुमिना घर नआएपछि आफन्तले २२ गते प्रहरीमा खबर गरेका थिए । आफन्तले दिएको सूचनाका आधारमा प्रहरीले बालिकाको खोजी सुरु गरेको थियो ।
जिल्ला प्रहरी कार्यालय रसुवाका डीएसपी इन्द्र सुवेदीले बाह्रखरीसँग भने,“सुरुमा हामीले कुनै सुराक पाउन सकेनौं । केही समयपछि सुमिना अध्ययनरत विद्यालय आसपासमा एक युवती देखिएको खबर हामीले पायौँ ।
अनुसन्धान गर्दै तीनै युवतीले बालिकाको सुनको मुन्द्रा लुट्नका लागि हत्या गरेको पाइयो ।”
सुमिनाको शव कालिका गाउँपालिका–१ स्थित नागुर्दुङ भीरको ओडारमा घाँसले छोपिएको अवस्थामा मंगलबार फेला परेको हो । हत्यामा संलग्न आरोपमा प्रहरीले नुवाकोटको किस्पाङ गाउँपालिकाकी १९ वर्षीया सपना तामाङलाई पक्राउ गरेको छ ।
डीएसपी सुवेदीका अनुसार सुरुमा सपनाले बालिकालाई काठमाडौं बौद्धमा पुर्याइएको बताएकी थिइन् ।
सुवेदीले भने,“बौद्धमा बालिका छन् भनेपछि हामी काठमाडौं प्रहरीसँग समन्वय गर्दै राति पुग्यौँ । तर बालिका भेटिइनन् । खासमा सपनाले झुक्याएकी रहिछन् । अनुसन्धान गर्दै जाँदा रसुवामै हामीले बालिकाको लुगा भेटायौँ । खोज्दै जाँदा केही पर उनको शव भेटियो ।”
सुरुमा प्रहरीलाई झुक्याएकी सपनाले आफूले सुनका लागि चाउचाउ दिएर बालिकालाई फकाएर लगेको स्वीकार गरेकी छन् । सपनाको भनाइ उद्धृत गर्दै डीएसपी सुवेदीले भने,“मैले फकाएर लगेपछि उनको कानको मुन्द्रा झिकेँ ।
सुनको मुन्द्रा निकालेपछि सुमिनाले आफ्नो घरमा भनिदिन्छु भनेपछि मैले डोरीले घाँटी कसेर मारेकी हुँ ।”
सपनाले लुटेको सुन सोही क्षेत्रमा ६ हजारमा बेचेको समेत पाइएको छ । घटनास्थलबाट बालिकाको झोला, चप्पल र चाउचाउको प्याकेटसमेत बरामद भएको छ । सपना यसअघि समेत तीनपटकसम्म सुन चोरीसम्बन्धी मुद्दामा पक्राउ परेर छुटदै आएको प्रहरी रेकर्डबाट खुलेको छ ।
एकवर्ष बाल सुधारगृह भक्तपुरमा बसेर सपना केही समयअघि मात्रै बाहिर निस्किएकी थिइन् ।
उनीविरुद्ध अपरहण तथा ज्यान मार्ने उद्योगमा मुद्दा दर्ता तथा अनुसन्धान प्रक्रिया अगाडि बढाइएको छ ।