काठमाडौं, ६ साउन–नेपाली कांग्रेसका सभापति शेरबहादुर देउवाले बिपी कोइराला सानो देशका अग्लो व्यक्तित्व तथा दुरदर्शी राजनेता भएको बताएका छन्। जननेता बिपीको ३८औँ पुण्य तिथिका अवसरमा पार्टीको सूचना, सञ्चार तथा प्रचार विभागले मंगलबार जुम प्रविधिमार्फत आयोजना गरेको कार्यक्रममा उनले बिपीको प्रजातान्त्रिक समाजवाद विचार आज झनै सान्दर्भिक भएको बताए।
‘नेपालले आज हिँड्ने मूल बाटो बिपीकै विचार र विश्वासको बाटो होु, उनले भने, ‘उहाँको बाटो इमान्दार ढङ्गले पछ्याएर मात्रै हामी सबैले समृद्धिको लक्ष्य हासिल गर्न सक्छौँ।’ आज राष्ट्रियताका विषयमा मुलुकमा विशेष छलफल भइरहेका बेला बिपीको विचार र विश्लेषणकै माध्यमबाट हामीले राष्ट्रभित्र राष्ट्रिय एकता र मेलमिलापको भावनाका साथ समाधान पहिल्याउनुपर्ने सभापति देउवाको भनाइ थियो ।
कार्यक्रममा समाजवादी चिन्तक तथा पार्टी केन्द्रीय सदस्य प्रदीप गिरीले कार्यक्रमका प्रस्तोता डा सुरेश आचार्य एवं स्वदेश र विदेशबाट जोडिएका सहभागीका बिपी विचार केन्द्रित विभिन्न जिज्ञासाको उत्तर दिएका थिए। बिपी मनोवैज्ञानिक कथा र उपन्यास लेखनमा बेजोड पनि थिए।