उदयपुर, ३० माघ–नेकपा (एकीकृत समाजवादी) का सम्मानीत नेता तथा पूर्वप्रधानमन्त्री झलनाथ खनालले आफू नेकपा (एमाले) मा जाने कुनै सम्भावना नरहेको जिकिर गरेका छन् ।
आज (बुधबार) एकीकृत समाजवादी पार्टी निकट समाजवादी प्रेस संगठन उदयपुरले गरेको पत्रकार सम्मेलनामा बोल्दै पूर्व प्रधानमन्त्री तथा सम्मानित नेता खनालले मतिभ्रष्ट भएकाहरुले एमालेमा फर्किँदैछ भनेर कुप्रचार गरेका दाबी गरेका छन् ।
नेता खनालले भने, ‘मति भ्रष्ट भएकाहरुले म एमालेमा फर्किँदैछ भनेर कुप्रचार गरेका हुन् । म आफ्नो विचार, नीति र सिद्धान्तमा प्रस्ट छु ।’
खनालले सरकारले ल्याएको अध्यादेश सदनबाट स्वीकृत नहुने अवस्था आउँदा पनि वर्तमान सरकारले नैतिकताको आधारमा सत्ता छाडन नमानेको आरोप समेत लगाएका छन् ।
अध्यादेश पास नहुने निश्चित हुँदा कांग्रेस र एमालेले सरकार ओगटेर बसेको उनको भनाइ छ । फरक प्रशंगमा खनालले साना दल फुटाउनेगरि सरकारले अध्यादेश ल्याएमा त्यसको असर ठूला दललाई नै पर्ने बताएका छन् ।
समाजवादी प्रेष संगठन उदयपुरका अध्यक्ष इश्वर मगरको अध्यक्षतामा पत्रकार सम्मेलन भएको थियो ।