काठमाडौं, १६ चैत–नेपाली कांग्रेसका सभापति शेरबहादुर देउवाले अहिले देश एकढिक्का भएको भन्दै कसैले चाहेर गणतन्त्र हट्न नसक्ने बताएका छन् । नेपाल लेखक संघको आठौं अधिवेशनको उद्घाटन सत्रलाई सम्बोधन गर्ने क्रममा उनले यस्तो बताएका हुन् ।
उनले शुक्रबार तीनकुनेमा भएको हिंसात्मक घटनाक्रमबारे चर्चा गर्दै पूर्वराजा शाह संवैधानिक राजा बन्न नसक्ने दोहोर्याए । पूर्वप्रधानमन्त्रीसमेत रहेका देउवाले भने, ‘हिजोको घटना जो काठमाडौंमा भयो, जसरी पूर्वराजाको नाममा हुलहुज्जत भयो ।
अराजक तरिकाले धेरै घटना भयो । यी पूर्वराजा ज्ञानेन्द्र अहिले यस्तो गर्छन् भने राजा भए के गर्लान् रु यिनी कहिल्यै पनि संवैधानिक राजा बनेका पनि छैनन् । बन्ने पनि छैनन् ।’
उनले गणतन्त्र स्थापनाको लागि नेपाली जनताले ठूलो त्याग र बलिदानी दिएका स्मरण गर्दै भने, ‘मुलुक गणतन्त्रबाट पछाडि फर्किंदैन ।’ राजावादीका नाममा भएका जुनसुकै हर्कतले पनि गणतन्त्रलाई कुनै प्रभाव नपार्ने भन्दै कांग्रेस पनि त्यसतर्फ स्पष्ट रहेको उनले बताए।