गाईघाट (उदयपुर), ३ चैत–आइतबार साँझ आएको हावाहुरीका कारण उदयपुरको कटारीमा दुई जनाको मृत्यु भएको छ भने पाँच जना घाइते भएका छन् ।
मृत्यु हुनेमा कटारी नगरपालिका–८ थलीयाटारकी ४९ वर्षीया मिनामाया तामाङ र कटारी नगरपालिका–५ का ६४ वर्षीय वीरेन्द्र चौधरी रहेका छन् ।
इलाका प्रहरी कार्यालय कटारीका अनुसार कटारी–५ स्थित राधा कृष्ण मन्दिर नजिक टिनको छाना र काठले बनेको खाजा घरमा वर्षासँगै आएको हावाहुरीका कारण सुकेको सालको रुख ढल्दा चौधरीको ज्यान गएको हो।
सोही घटनामा रुखले किचेर पाँच जना घाइते भएका छन्। घाइते हुनेमा ४ वर्षीया बिनिशा चौधरी, कटारी -५ आहालेडाँडाका २७ वर्षीय युवराज कार्की, कटारी -५ बलाहाका ४६ वर्षीय लीला बहादुर दनुवार, सोही स्थानका ४६ वर्षीय प्रेमचन्द्र दनुवार तथा कटारी–१२ बसेरीकी १६ वर्षीया अस्मिता परियार रहेका छन्। उनीहरूको प्रादेशिक अस्पताल कटारीमा उपचार भइरहेको छ।
घटनामा घाइते भएकी ४ वर्षीया बिनिशा चौधरीलाई नेपाल प्रहरी, सशस्त्र प्रहरी र स्थानीयवासीको सहयोगमा करिब ४० मिनेटपछि उद्धार गरिएको इलाका प्रहरी कार्यालय कटारीका प्रमुख प्रहरी नायब उपरीक्षक केदारमान दोङले जानकारी दिए।
यस्तै कटारी–८ की मिनामाया तामाङ घरमा खसी–बाख्रा सार्ने क्रममा हावाले भाँचिएको रुखको हाँगाले लागेर गम्भीर घाइते भएकी थिइन्। उपचारका लागि उनलाई प्रादेशिक अस्पताल कटारी लगिएको भए पनि चिकित्सकले राति ९स्१० बजे मृत घोषणा गरेको प्रहरीले जनाएको छ।
घाइतेमध्ये टाउकोमा गम्भीर चोट लागेका कटारी–५ बलाहाका ४६ वर्षीय लीलाबहादुर दनुवारलाई थप उपचारका लागि विराटनगर पठाइएको प्रहरी नायब उपरीक्षक दोङले बताए।