धुलाबारी, ३२ साउन–झापा क्षेत्र नं १ मा झापा विद्रोहका योद्धादेखि शहीद परिवारसम्मले घर पाएका छन् ।
स्थानीय पूर्वाधर विकास साझेदारी कार्यक्रम, झापा क्षेत्र नं १ अन्तर्गत ‘आवाजविहीनका लागि आवास’ कार्यक्रम शीर्षकमार्फत् उनीहरुले घर पाएका हुन् । आर्थिक वर्ष २०७७/०७८ मा यहाँका २७ परिवारलाई घर निर्माण गरी हस्तान्तरण गरिएको झापा क्षेत्र नं १ का सांसद् राम कार्की (पार्थ) ले जानकारी दिनुभयो ।
जनता आवास कार्यक्रम र तराई मधेश समृद्धि कार्यक्रमले समेट्न नसकेका शहीद परिवार, राज्य व्यवस्था परिवर्तनका लागि योगदान दिएका, एकल महिला, बृद्ध–बृद्धा, विपन्न, आदिवासी–जनजाति लगायतलाई घर निर्माण गरेर हस्तान्तरण गरिएको उहाँले बताउनुभयो ।
यो कार्यक्रम अन्तरगत मेचीनगर–११ का शहीद गणेश लम्सालकी धर्मपत्नी मैया आचार्य लम्साललाई घर निर्माण गरी हस्तान्तर गरिएको छ । लम्सालले माओवादी जनयुद्धताका २०६१ फागुन २ गते मोरङको जाँतेमा जनमुक्ति सेना र तत्कालीन शाही सेनाबीच भएको दोहोरो भिडन्तमा सहादत प्राप्त गर्नुभएको थियो ।
माओवादी केन्द्रका केन्द्रीय सल्लाहकार सदस्य मुकुलचन्द्र राजवंशीले शहीदलाई विभिन्न कार्यक्रममा एक मिनेट मौन धारणमै सीमित गरिएको बताउँदै भन्नुभयो, “शहीर परिवारको घर बन्नु उदाहरणीय कार्य हो, शहीदप्रतिको सम्मान हो ।” उहाँले व्यवस्था परिवर्तनका लागि सहादत प्राप्त गर्नेका परिवार र जीउँदा शहीदहरुलाई हेर्नुपर्नेमा जोड दिनुभयो ।
त्यस्तै, सोही कार्यक्रम अन्तरगत झापा विद्रोहका योद्धा मेचीनगर–१० का ७० वर्षीय सानो दुर्गा अधिकारीले नयाँ घर पाउनुभएको छ । भाडाको घरमा बस्दै आउनुभएका उहाँको आफ्नै घरमा बस्ने सपना पूरा भएको छ ।
नेकपा एमाले अध्यक्ष केपी ओलीसँगै विसं। २०३० सालमा पक्राउ पर्नुभएका अधिकारीले १७ वर्ष लामो कठोर जेल जीवन बिताउनुभएको थियो । अध्यक्ष ओलीभन्दा तीन वर्ष बढी समय जेलनेल भोगर उहाँ विसं। २०४६ सालमा जेलमुक्त हुनुभएको थियो ।
प्रजातन्त्र प्राप्तिमा जीवनका उर्वर समय अर्पण गर्ने अधिकारीको आर्थिक अवस्था भने कमजोर छ । “बुढेसकालमै भए पनि घर पाएपछि बस्नलाई सजिलो भयो”, उहाँले भन्नुभयो, “अब राज्यको तर्फबाट भरण–पोषणको व्यवस्था भए अरु केही चाहिँदैनथ्यो ।”
लम्साल र अधिकारीसँगै मेचीनगर नगरपालिकाका २० र बुद्धशान्ति गाउँपालिकाका सात परिवारले घर पाएका छन् ।
मेचीनगर-१ का ख्याम तामाङ, २ की मिठुमाया रेग्मी, ३ का हरिभक्त अधिकारी, ४ का सहदेव माझी र भीमबहादुर खत्री, ५ का दलबहादुर बस्नेत, ६ का कृष्णप्रसाद खनाल, ७ की मैयादेवी गुरुङ, लीलाराम गौतम, लिदलबहादुर कुमाल, ९ का वेदप्रकाश राई, यादव चापागाईं, नविन पौडेल, १२ का केशव दनुवार र प्रवास धिमाल, १३ का हरिमान थेवे, १४ की मिना बिर्जा र १५ नं। वडाका कमल भण्डारीले घर पाएको सांसद् कार्कीका स्वकीय सचिव शिबु बुढाथोकीले जानकारी दिनुभयो ।
मेचीनगरमा निर्माण भएका घरहरुको लागत प्रतिघर रू तीन लाख ४५ हजार रुपैयाँ र रू ७० हजार रुपैयाँ बराबरको श्रमदान गरी कूल रू चार लाख १५ रहेका बुढाथोकीले बताउनुभयो । बुद्धशान्तिमा निर्माण गरिएका घरको लागत रू तीन लाख र रू ७० बराबरको श्रमदान रहेको छ ।
कार्यक्रम अन्तरगत दुई कोठा र बरण्डा भएको घर निर्माणका लागि बजेट आए पनि अधिकांश लाभग्राहीले स्थानीय र अन्य दाताको थप सहयोगबाट तीन कोठाको घर बनाएका छन् ।