दमक, १ मंसिर–आन्तरिक राजश्व कार्यालय दमकले आज दशौं राष्ट्रिय कर दिवस तथा कर सप्ताह अन्तर्गत दमक नगरमा प्रभातफेरी गरेको छ ।
मंसिर १ गतेदेखि ७ गतेसम्म चल्ने कर सप्ताहको अवसरमा आन्तरिक राजश्व कार्यालय दमकले आज बिहान प्रभातफेरी गरेको हो । दमक ५ स्थित आन्तरिक राजश्व कार्यालय परिसरबाट शुरु भएको प्रभातफेरी दमक गणतन्त्र चोक, फर्निचर लाइन, शंखधर शाख्वा चोक, सुर्तीलाइन हुँदै नमूना बजारमा पुगेर कोणसभामा परिणत भएको थियो ।
राजश्व कार्यालय दमकका निमित्त कार्यालय प्रमुख कर अधिकृत तिलक आलेको अध्यक्षतामा भएको कार्यक्रमका सहभागी वक्ताहरुले सरकारलाई कर तिर्नु संस्था, हरेक कर्मचारी, नेता नागरिक, ब्यापारी, ब्यवसायी सबैको कर्तब्य र जिम्मेवारी भएकोमा जोड दिइएको थियो । आफ्नो मन्तब्यमा दमक उद्योग वाणिज्य संघका कार्यवाहक अध्यक्ष राजु खड्काले प्रविधि मैत्री कर प्रणालीलाई सबैले प्रयोगमा ल्याउनु पर्ने सुझाव दिए ।
कार्यक्रममा शिवसताक्षी उद्योग वाणिज्य संघका अध्यक्ष भोलानाथ मैनाली र कमल उद्योग वाणिज्य संघका अध्यक्ष उमानाथ भण्डारीले स्वेच्छिक कर सहभागितामा अभिवृद्धि, सुशासन, विकास र समृद्धि भन्ने नारालाई ब्यवहारमा प्रयोग गर्नुपर्ने औंल्याएका थिए ।
सो कार्यक्रममा इलाका प्रहरी कार्यालय दमकका प्रमुख डिएसपी नवराज कार्कीले कर स्वेच्छिकभन्दा पनि अनिवार्य रुपमा राज्यलाई नागरिकले तिर्नुपर्ने बताए । सरकार कडा रुपमा कर संकलनमा लाग्नु पर्ने उनको सुझाव छ ।
कर सप्ताह अन्तर्गत सप्ताहब्यापी करदाता शिक्षा तथा अन्तरक्रिया कार्यक्रम गरिने आन्तरिक राजश्व कार्यालय दमकका कर्मचारी प्रदिप बरालले जानकारी दिएका छन् ।