धनगढी, २९ फागुन–सर्वाधिक धनराशीको पाँचौ मुख्यमन्त्री सुदूरपश्चिम खप्तड गोल्डकप फुटबल प्रतियोगिताको उपाधि मनाङ मर्स्याङ्दी क्लबले हात पारेको छ।
धनगढी रंगशालामा शनिबार भएको फाइनलमा फ्रेन्ड्स क्लबलाई ३-१ गोल अन्तरले पराजित गर्दै मनाङ दोस्रोपटक च्याम्पियन बनेको हो। मनाङको जितका लागि दिनेश राजवंशी, आफिज ओलावाले र मौसा अबागानाले एकरएक गोल गरे।
उपाधिसँगै मनाङले २१ लाख नगद प्राप्त गरेको छ। उपविजेता बनेको फ्रेन्ड्सले १० लाख नगद प्राप्त गरेको छ। सुदूरपश्चिम–११ स्पोर्टस क्लब धनगढीले आयोजना गरेको प्रतियोगितामा १० टिमको सहभागिता रहेको थियो।
फ्रेन्ड्सका जमोउल एन्थोनी फ्रान्कोइसले एक गोल फर्काए। खेलको २२ औं मिनेटमा दिनेशले फ्रि(किकबाट गोल गर्दै मनाङलाई सुरुआती अग्रता दिलाए। ५१ औं मिनेटमा जमोउलले गोल गर्दै फ्रेन्ड्सलाई १(१ गोलको बराबरीमा ल्याए।
खेलको ७२ औं मिनेटमा आफिजले गोल गर्दै मनाङलाई २-१ को अग्रता दिलाए भने खेलको इन्जुरी समयमा मौसाले गोल गर्दै मनाङलाई ३-१ को जित दिलाए।
खेलको ८६ औं मिनेटमा मनाङका रुपेश केसी र फ्रेन्ड्सका श्यामबाबु क्याप्छाकीले रातो कार्ड पाएपछि दुबै टोली १० खेलाडीमा समेटिए।