बिर्तामोड, १५ कात्तिक–नेपाल आदिवासी जनजाति महासंघले झापाका पाँचै वटा निर्वाचन क्षेत्रका उम्मेदवारसँग अन्तरक्रिया गर्ने भएको छ ।
महासंघले कात्तिक १७ गतेदेखि आदिवासी जनजातिका हक अधिकारका विषयलाई समेटेर उनीहरुसँग अन्तरक्रिया गर्ने भएको हो । महासंघले पाँचै वटा क्षेत्रका प्रतिनिधिसभा, प्रदेशसभाका प्रत्यक्ष एवम् समानुपातिकतर्फ दलीय र स्वतन्त्र उम्मेदवारहरुसँग अन्तरक्रिया गर्न लागिएको बिर्तामोडमा आज आयोजित पत्रकार सम्मेलनमा महासंघका उपाध्यक्ष केवलराम राईले जानकारी दिनुभयो ।
संविधानले आदिवासी जनजातिको अधिकार सुनिश्चित गरे पनि कार्यान्वनमा नआएको, आइएलओ को १६९ मा उल्लेख भएका आदिवासी जनजातिका कुराहरुको बेवास्ता गरिएको लगायतका आदिवासी जनजातिसँग जोडिएका स्थानीय र राष्ट्रिय मुद्दाहरुलाई समेटेर जितेर गएपछि सोको कार्यान्वयनका लागि प्रतिबद्धता लिने मुख्य उद्देश्य रहेको जनाइएको छ ।
महासंघका अध्यक्ष पाण्डवलाल चौधरीले झापा ६५५ जनसंख्या आदिवासी रहे पनि आदिवासीको मुद्दा ओझेलमा परेको बताउनुभयो । “आदिवासीको धर्म, भाषा, लिपी, संस्कार संस्कृति लोप हुँदै गएको छ”, उहाँले भन्नुभयो, “त्यसको संरक्षण राज्यबाट हुन सकेको छैन, आदिवासीको माग सम्बोधन हुन जरुरी छ ।”
महासंघले कुनै पनि दलको उम्मेदवारलाई काखापाखा नगर्ने तर आदिवासी जनजातिको मुद्दामा प्रतिबद्धता लिने उद्देश्यले अन्तरक्रिया गर्न लागिएको जनाइएको छ ।
झापा क्षेत्र नं १ मा १७ गते काँकरभिट्टामा, २ मा १९ गते बिर्तामोडमा, ३ मा २० गते भद्रपुरमा, ४ मा २३ गते सुरुङ्गामा र झापा क्षेत्र नं। ५ मा २२ गते पाडाजुँगी (कमल–५) मा हुने आयोजकले जनाएको छ ।
महासंघ झापा अध्यक्ष चौधरीको अध्यक्षतामा भएको कार्यक्रमको सञ्चालन सचिव लक्ष्मण श्रेष्ठले गर्नुभएको थियो ।