काठमाडौं, ५ चैत–जनता समाजवादी पार्टीका अध्यक्ष उपेन्द्र यादवले पार्टीभित्र प्रधानमन्त्री केपी शर्मा ओलीसँग सहकार्य गर्ने प्रस्ताव कसैले नल्याएको बताएका छन् ।
उनले संसद विघटन गर्ने ओलीको कदम प्रतिगामी भनेर भनिसकेका कारण उनीसँग कुनै पनि हालतमा सहकार्य नहुने स्पष्ट पारे । ‘ओलीसँग सहकार्य गर्नुपर्छ भनेर कसैले प्रस्ताव ल्याउनु भएको छैन’, अध्यक्ष यादवले भने, ‘हामी प्रतिगमनकारी शक्तिविरुद्ध उभिन्छौं, उनीसँग लगनगाँठो कस्न सक्दैनौं ।’
आज बसेको शीर्ष नेताको बैठकपछि पत्रकारसँग कुरा गर्दै अध्यक्ष यादवले आफूहरु ओलीसँग संसद विघटनको विपक्षमा रहेका शक्तिहरु मिलेर अगाडि बढ्ने बताएका हुन् ।
ओलीसँगको सहकार्य गर्नु भनेको मधेस र मधेस आन्दोलनप्रति धोका दिनु र संघीयता र गणतन्त्र समाप्त पार्नु भएको उनको भनाइ थियो । सत्ता समीकरणका लागि निर्णायक मानिएको राजपाको आज बस्ने भनिएको केन्द्रीय कार्यकारिणीको बैठक तयारी नपुगेको भन्दै स्थगित गरिएको छ ।