झापा, १३ फागुन–‘पैसा देखाएर’ ठगी गर्न आएको भारतीय गिरोहलाई झापामा पक्राउ गरी सार्वजनिक गरिएको छ । सशस्त्र प्रहरीले शंका लागेर नियन्त्रणमा लिएको गिरोहलाई बुधबार झापा प्रहरीले सार्वजनिक गरेको हो ।
उनीहरुलाई भद्रपुर नगरपालिका–८ घोडामारा एयरपोर्ट सडकखण्डबाट मंगलबार साँझ सशस्त्र प्रहरी बल नेपाल नं। २ हेडक्वार्टर गणले नियन्त्रणमा लिएको झापाका प्रहरी प्रवक्ता खगेन्द्रबहादुर खड्काले जानकारी दिए । उनका अनुसार घोडामारामा सशस्त्र प्रहरीले शंका लागेर चेकजाँच गरेको थियो । जिल्लामा ठूलै ‘स्क्याम’ गर्न आएको भारतीय गिरोहलाई पक्राउ गरिएको प्रहरीको भनाई छ ।
शंकास्पद अवस्थामा दुईवटा भारतीय सवारीमा हिडिरहेको समूहलाई सशस्त्र प्रहरी बलले पक्राउ गरी झापा प्रहरीलाई बुझाएको थियो । अनुसन्धान गर्दा संगठित रुपमा ठगी गर्ने गिरोह भएको प्रारम्भिक अनुसन्धानबाट खुलेको प्रहरी प्रवक्ता खड्काको भनाई छ ।
संगठित रुपमा ठगी, अपराधमा संलग्न रहेको आधारमा प्रहरीले एक नेपालीसहित ७ जनालाई पक्राउ गरी कारबाहीको प्रक्रिया अघि बढाएको जनाइएको छ । पक्राउ पर्नेहरुमा भारत पश्चिम बंगालका अरिन्दम धर ९४५०, दिपा भौमिक ९३६०, सुमन सरकार ९३५०, नुर कलाम शेख ९३७०, अबेद अली होसैन ९५२०, फारुक अज्मी ९२०० तथा झापा कमल गाउँपालिका–६ का देवेन्द्र सापकोटा ९४३० रहेका छन् ।
प्रहरीका अनुसार गिरोहले पैसाको बण्डल बनाउने र भिडियो बनाएर चिनजान तथा व्यापारीहरुलाई पठाउने गरेको थियो । २१ वटा टिनका बाक्सा र पैसा जस्तै देखाउन २३७ वटा कागजका बण्डल प्रहरीले बरामत गरेको छ । कागजको बण्डलमा माथि र तल सक्कली पैसा राखेर भिडियो बनाउँदै पठाउने गरेको प्रहरी अनुन्धानबाट खुलेको छ ।
प्रहरीको प्रारम्भिक अनुसन्धान अनुसार अभियुक्तहरूले संगठित रूपमा ठगी गर्ने उद्देश्यले नोट आकारका सादा कागजको बण्डलको माथि तल सक्कली नोट राखी भिडियो बनाउने गरेका थिए । सो भिडियोसँगै सरकारी पत्रसमेत संलग्न गरेर ठूलो रकम कानुनी अड्चनका कारण जफत भएको र जरिवाना बुझाउन रकम आवश्यक परेको भन्ने भिडियो सन्देश पठाई विभिन्न व्यक्तिहरूलाई ठग्ने योजना बनाएका थिए ।
उनीहरूले करिब डेढ महिनाअघि मेचीनगर–४ स्थित एक होटलमा बसेर उक्त नक्कली रकमको फोटो तथा भिडियो बनाएको समेत खुलेको छ । कागजातहरूलाई विश्वासिलो देखाउन नोटरीबाट प्रमाणित गराउने उद्देश्यले गिरोह भारतबाट काँकडभिट्टा नाका हुँदै चन्द्रगढी आएको प्रहरीले जनाएको छ ।
प्रहरीका अनुसार भारतीय नम्बर प्लेटका डब्लुबि ०६ यु ३००६ सुजुकी कम्पनीको बालेनो र डब्लुबि ०६ एक्स ०३०० टोयोटा फच्र्युनर गाडीमा सवार उनीहरूको साथबाट नेपाल सरकारको निशान छाप प्रयोग गरिएका विभिन्न नक्कली कागजात, प्रेस लेखिएको गाडी, कर चुक्ता प्रमाणपत्र, भन्सार सम्बन्धी कागज, नक्कली प्रहरी परिचय पत्र, स्ट्याम्प प्याड, विभिन्न भारतीय परिचयपत्र तथा धेरै मोबाइल फोन बरामद गरिएको प्रहरीले जनाएको छ ।
प्रहरीले मेचीनगर नगरपालिका–४ आमडाँगीस्थित लुकाइ राखिएको स्थानबाट २१ वटा टिनका बाक्सा र २३७ बन्डल नोट आकारका सादा कागजसमेत फेला पारेको थियो । कागजको २३७ वटा बण्डललाई गिरोहले नेपाली १२ करोडको स्टमेट गरेर तयार गरेको बुझिएको छ ।
प्रहरीले उनीहरूले नेपाल–भारत सीमावर्ती क्षेत्रमा यस्तै प्रकृतिका ठगी तथा अन्य स्क्याममार्फत दुबै देशका नागरिकलाई पीडित बनाएको हुन सक्ने आशंका व्यक्त गरेको छ । जिल्ला प्रहरी कार्यालय झापाले यस समूहबाट ठगीमा परेको हुन सक्ने व्यक्तिहरूलाई कार्यालयमा सम्पर्क गर्न अनुरोध गरेको छ ।
पक्राउ परेका सबैलाई मुलुकी अपराध संहिता, २०७४ अन्तर्गत लिखत सम्बन्धी कसुरमा अनुसन्धान तथा कारबाही प्रक्रिया अघि बढाइएको प्रहरी प्रवक्ता खड्काले जानकारी दिए ।