काठमाडौँ, ६ जेठ–हाल नेपालमा पश्चिमी वायु र स्थानीय वायुको दोहोरो प्रभाव कायम रहेको छ । जल तथा मौसम विज्ञान विभाग, मौसम पूर्वानुमान महाशाखाका अनुसार यस मौसमी प्रणालीका कारण अहिले देशका पहाडी तथा हिमाली क्षेत्रहरूमा सामान्य रूपमा बदली भएको छ भने तराईका भूभागहरूमा मौसम सामान्यतया सफा रहेको छ ।
महाशाखाका अनुसार आज दिउँसो कोशी, मधेस, बागमती र गण्डकी प्रदेशका साथै लुम्बिनी र कर्णाली प्रदेशका पहाडी तथा हिमाली भेगमा साधारणतया बादल लाग्ने अनुमान गरिएको छ । अन्य प्रदेशका पहाडी र हिमाली क्षेत्रमा आंशिक बदली हुने देखिन्छ भने बाँकी तराईका भूभागमा मौसम सफा नै रहनेछ ।
यसैगरी, कोशी, बागमती र गण्डकी प्रदेशका केही क्षेत्रहरूमा तथा मधेस प्रदेशसहित बाँकी पहाडी र हिमाली भूभागका थोरै स्थानमा मध्यम स्तरको वर्षा र हिमपातको सम्भावना रहेको छ । यता सुदूरपश्चिम र लुम्बिनी प्रदेशका तराई क्षेत्रमा भने अत्यधिक गर्मी भई ‘तातो दिन’ हुन सक्ने महाशाखाले बुलेटिनमार्फत जानकारी दिएको छ ।
आज रातिको मौसमबारे जानकारी दिँदै महाशाखाले कोशी, मधेस, बागमती र गण्डकी प्रदेशमा साधारणतया बदली रहने र बाँकी पहाडी तथा हिमाली भेगमा आंशिक बादल लाग्ने बताएको छ । तराईका बाँकी क्षेत्रमा भने रातिको मौसम पनि मुख्यतया सफा रहनेछ ।
यस्तै, कोशी, मधेस, बागमती र गण्डकी प्रदेशका एक–दुई स्थानमा रात्रिकालीन समयमा मेघगर्जन र चट्याङसहित हल्का वर्षा र हिमपात हुन सक्ने सम्भावना रहेको मौसम पूर्वानुमान महाशाखाले औंल्याएको छ ।