धरान, १० चैत–धरान उप–महानगरपालिका–१६ की २१ बर्षीया सुमना श्रेष्ठको हत्यामा संलग्नलाई प्रहरीले पक्राउ गरेको छ । गत चैत ७ गते धरानको विपि कोईराला स्वास्थ्य विज्ञान प्रतिष्ठान र डिपोट स्कूलबीचमा रहेको खोल्सामा पहिचान नखुलेको महिला शब भेटिएको थियो ।
शब भेटिएको खबर पाउन साथ जिल्ला प्रहरी कार्यालय सुनसरी, इलाका प्रहरी कार्यालय धरान, नेपाल प्रदेश प्रहरी कार्यालय धरानबाट कुकुरसहितको प्रहरी टोलीले अनुसन्धान सुरु गरेको थियो । त्यसक्रममा प्रहरीको टोली घटनास्थलमा खटिगई घटना सम्बन्धमा प्रारम्भिक अनुन्धान थालेको थियो ।
अनुसन्धानको क्रममा उक्त शव धरान उप–महानगरपालिका–१६ की २१ बर्षीया सुमना श्रेष्ठको रहेको खुल्न आएको थियो । घटनाको प्रकृति हेर्दा मृतक सुमना श्रेष्ठको हत्या भएको देखिएपछि प्रहरीले सुक्ष्म रुपमा अनुसन्धान थालेको थियो ।
प्रहरीले गहिरो अनुसन्धान पश्चात हत्यामा संलग्न धरान उप(महानगरपालिका–१७ का १९ बर्षीय सविन भन्ने बाबुराम भुजेललाई पक्राउ गरेको हो । मृतक श्रेष्ठ र भुजेलबीच करीब २ बर्षदेखि फेसबुकमार्फत प्रेम सम्बन्ध रहेको र बिस्तारै सम्बन्धमा खटपट हुँदै गएपछि चैत्र ६ गते भुजेल मृतक श्रेष्ठलाई भेट्न धरान आएको र भेटघाट गरी आफ्नै स्कुटरमा श्रेष्ठलाई राखी स्कुटर चलाउन सिकाउदै जाने क्रममा उनिहरूको बिच फेसबुक प्रयोगको बिषयमा विवाद भएपछि भुजेलले श्रेष्ठको खुकुरीले घाटी रेटी हत्या पश्चात खोल्सामा फाली भागेको प्रारम्भिक अनुसन्धानबाट खुल्न आएको प्रहरीले जनाएको छ ।
भुजेललाई धनकुटा नगरपालिका–९ मुलघाटबाट लुकिछिपी बसेको अवस्थामा फेला पारी गत बिहीबार पक्राउ गरिएको थियो । घटना सम्बन्धमा थप अनुसन्धान तथा कानुनी कारवाही भईरहेको जिल्ला प्रहरी कार्यालय सुनसरीले जनाएको कोशी प्रदेश प्रहरीले जानकारी दिएको छ ।